د. مريم المنصورة المهدي تقترح تنظيم دورات تدريب فن الدفاع عن النفس للنساء

 

 

 

 

 

الحبيبة الدكتورة مريم المنصورة المهدي نائبة رئيس حزب الأمة القومي تقترح تنظيم دورات تدريب فن الدفاع عن النفس للنساء:

اشادت بحيوية الشعب السوداني ووقوفه لاصوله وقيمه واستجابته لحملة الكرامة بصورة كبيرة جداً واقترحت اقتراحاً مُهماً على أن تُنظم دورات فنية لتدريب الدفاع عن النفس للصحفيات والناشطات في مجال العمل العام تمكنهن من الدفاع عن أنفسهن في حالة الإعتداء عليهن وفيما بعد تنتقل الدورات للنساء في المعسكرات لاحقاً، وقالت نائبة رئيس حزب الأمة القومي الحبيبة الدكتورة مريم المنصورة الصادق المهدي في مداخلتها في المؤتمر الصحفي الذي عقدته منظمة لا لقهر النساء أمس الثلاثاء 11 يوليو 2017 بدار الأمة بعد إطلاق سراح الصحفية الأستاذة أمل هباني ما يلي:

بسم الله الرحمن الرحيم والصلاة والسلام على رسول الله وحمد الله على السلامة يا حبيبة والله يقويكي ويقوي الجميع على مواصلة المشوار. الحقيقة يعني ملاحظتي على أنه مُش بداية الحملات، الحملة دي في استجابة ليها بصورة مدهشة، ودة المفترض يكون في زمن بعد 28 سنة الناس ديل تمكنوا والناس ديل احبطوا الروح المعنوية للناس، أنا من الناس الكنت بفتكر إنه الشعب السوداني اخطر ما بيعاني منو حالة الاحباط، لكن واضح جداً إنه الشعب السوداني حى بصورة كبيرة جداً جداً، وواقف باصوله ولقيمه بصورة كبيرة جداً جداً. المسألة الحصلت دي من المؤسف إنه لغاية الآن المسؤولين الصحفيين الرسميين المسماة إتحاد الصحفيين، لغاية حسة ما يقولوا كلمة، نقيب الصحفيين ما يجي يزور الأستاذة أمل في سجنها ولا يقولوا ليها بإنهم هم حيدفعوا الغرامة. أنا بشهد على إثنين مواطنين لوحدهم دفعوا الغرامة الكاملة وأنا حسة دي في حوزتي، وأنا قلت ليهم أنا ما بسلمها وهو كان مُصر إنه يضمنها قلت ليهو ما بسلمها قبل التشاور مع أستاذ شوقي بالتالي أنا حأرجع ليهو 9 مليون لأنه الفكرة إنه زى ما قرروا الأسرة ومجموعات المناصرة كلهم إنه الدفع من الناس كلهم دة غير الناس الحولناهم بعد داك للارقام. حقيقة الحاجة الحصلت دي مرة أُخرى بتؤكد إنه دة جهاز دخيل علينا. دخيل علينا، الكذب والحاجات دي طبيعي، يعني متعودين عليها، لكن كونه يصفع سيدة وبعدين يجي ويشتكي بفتكر دي مسألة كبيرة جداً جداً. تاني أنا بدعو الصحفيات كلهم وكل الناشطات، لازم الناس يعملوا دورات بتاعة دفاع النفس ولازم كل السيدات بالذات الطالعين العمل العام يبقى عندهم من القدرات الفنية البتخليهم يدافعو عن نفسهم لأنه صحي بعد ما يحصل الحدث الشعب السوداني كلو بيهب ويدافع عن الواحد دفاع كبير ودي تجربتي أنا لمن كسروا يدي، لكن أهم شئ أنهم يعرفوا النساء ديل ما بيكونوا قاعدات يدقوا فيهم ويضربوا فيهم زى ما دايرين، عشان كدة أنا بفتكر إنه وبقترح إننا كلنا من ضمن النشاطات البنمشي فيها من هنا لقدام في المجموعات النسوية إننا نعمل تدريب دفاع عن النفس لكل الناشطات بالذات طبعاً النساء الفي المسكرات ودي بنمشي فيها في مرحلة ثانية لكن ضروري نبدأ عمل بتاع النساء الناشطات في إنهم يعملوا دفاع عن النفس